Кумитаи дини Тоҷикистон хабар дод, ки дар мувофиқа бо Хадамоти зиддиинҳисорӣ арзиши хидматрасониҳо барои мавсими ҳаҷи соли равон 57 ҳазор сомонӣ муайян карда шуд. Дар ин бора маҷаллаи "Дин ва ҷомеъа" иттилоъ медиҳад

Бояд гуфт, ки соли гузашта нархи сафари ҳаҷи фарзӣ барои шаҳрвандони Тоҷикистон 59 ҳазор сомонӣ буд.

Ба иттилоъи ин манбаъ, маблағи мазкур барои харидории билети ҳавопаймо (рафту баргашт), иҷораи меҳмонхона дар шаҳрҳои Макка ва Мадина, таъмини се вақт хӯрок дар давоми сафар, хидматрасонии роҳбаладон, таъмини шароити иқомат дар Мино, Арафот ва Муздалифа, пардохти маблағи қурбонӣ, таъмини мусофирбар барои интиқоли ҳоҷиён ва дигар хадамот масраф мешавад.

Гуфта мешавад, ки довталабони сафари ҳаҷи фарзӣ бояд тибқи феҳрист пулҳои худро ба таври ғайринақдӣ тавассути намояндагиҳои “Ориёнбонк” пардохт кунанд.

Зикр мешавад, ки сафари зоирон аз Тоҷикистон ба ҳаҷ дар нимаи дувуми моҳи майи соли ҷорӣ дар назар дошта шудааст.

Зимнан Кумитаи дин ёдовар мешавад, ки тибқи тартиби муқарраркардаи Арабистони Саудӣ сафари зоирон барои адои маносики ҳаҷ танҳо тавассути ниҳодҳои давлатии кишварҳо амалӣ карда мешавад.

Гузашта аз ин тибқи тартиби нави ҷорикардаи Арабистони Саудӣ ба афроде, ки бо роҳҳои ғайрирасмӣ барои адои маносики ҳаҷ сафар мекунанд, ҷарима ба андозаи 50 ҳазор риёл (ҳудуди 13300 долар), ҳабс ба муддати шаш моҳ, ҳамчунин ихроҷ бо маҳрумият аз ҳуқуқи вуруд ба ин кишвар ба муддати 10 сол таҳдид мекунад.

Бояд гуфт, ки дар соли ҷорӣ Арабистони Саудӣ барои анҷоми ҳаҷи фарзӣ ба шаҳрвандони Тоҷикистон 7 ҳазор саҳмия ҷудо кардааст.