Амалисозии лоиҳаи «Шаҳри бехатар» дар маркази вилояти Суғд 80 дарсад иҷро шудааст, иттилоъ дод Фирдавс Шарифзода, раиси шаҳри Хуҷанд.

Ба гуфтаи вай, дар татбиқи лоиҳа баъзе мушкилоти марбут ба ҷаримаҳои баланд барои нақзи қоидаҳои ҳаракат дар роҳ ба миён омадаанд. Вай афзуд, ки дар ҳамкорӣ бо сармоягузор - ширкати Huawei пешниҳод шуд, ки фаъол шудани лоиҳаи мазкур аз ҷаримаҳои камтар оғоз шавад.

Раиси шаҳри Хуҷанд дар идома афзуд, ки дар доираи лоиҳаи «Шаҳри бехатар» дар 62 нуқтаи шаҳр дурбинҳои назоратӣ насб мешаванд.

 «Дар айни замон 80% корҳо ба анҷом расидаанд, сармоягузорон барои қадамҳои минбаъда омодаанд. Дар доираи лоиҳа насби дурбинҳои назорати видеоӣ дар 62 нуқтаи шаҳр ва навсозии ҳамаи чароғакҳои роҳ ба нақша гирифта шудааст. Арзиши умумии лоиҳа 10-12 миллион сомониро ташкил медиҳад», – зикр намуд Фирдавс Шарифзода.

Гуфта мешавад, ки ҳадафи лоиҳаи «Шаҳри бехатар» баланд бардоштани сатҳи қонуният ва тартиботи ҷамъиятӣ, назорати ҳаракати нақлиёт, пешгирии садамаҳои нақлиётӣ ва баланд бардоштани фарҳанги ронандагӣ мебошад.

Дар баробари ин, тибқи иттилои нашрияи «Хатлон» дурбинҳои «Шаҳри беҳатар» дар шаҳри Бохтар, маркази вилояти Хатлон низ насб карда мешаванд.

Нашрия навиштааст, ки барои татбиқи лоиҳа ёддошти тафоҳум оид ба ҳамкорӣ бо шарикони рушд ба имзо расидааст. Ҳамчунин гуфта мешавад, ки барои насби дурбинҳои назоратӣ дар шаҳри Бохтар 9 миллион доллар сармоягузорӣ мешавад.

Дар доираи лоиҳаи мазкур муоинаи ҳаракати нақлиёт дар роҳ, назорати видеоӣ, насби таҷҳизоти видеоӣ ба мошинҳои милитсия ва дигар тадбирҳои таъмини бехатарӣ дар шаҳри Бохтар пешбинӣ шудааст.

Ёдовар мешавем, ки дар Душанбе лоиҳаи “Шаҳри бехатар” моҳи октябри соли 2013 фаъол шуд. Дар доираи ин лоиҳа дар пойтахти Тоҷикистон наздики 900 дурбини назоратӣ дар роҳҳои мошингард ва маконҳои ҷамъиятӣ насб шудааст.

Дар телеграм моро пайгирӣ кунед!
https://t.me/halvaTJnews