Ҷудокор Виктория Киселёва аз Тоҷикистон бо касби медали тило исмашро дар таърихи ҷудои ин кишвар сабт кард.

Дар Ҳонгконги Чин мусобиқаи «Hong Kong Asian Open-2024» ба анҷом расид. Тоҷикистонро дар мусобиқаи мазкур ду бону Кан Александра дар вазни то 57 кг ва Виктория Киселёва дар вазни ҷамъи 78 кг муаррифӣ карданд.

Тибқи иттилои сомонаи varzishtv.tj, Виктория Киселёва зери вазни ҷамъи 78 кг дар мусобиқаи мазкур таърихсозӣ кард. Виктория бо мағлуб кардани ҳамаи рақибони худ дар ин сабқати байналмилалӣ ба гирифтани нишони тило даст ёфт.

Қобили зикр аст, ки ин дастоварди Виктория Киселёва дар таърихи ҷудои Тоҷикистон аввалин нишони тилои миёни бонувон дар мусобиқаҳои байналмилалӣ маҳсуб мешавад.

Варзишгари дигари Тоҷикистон дар ин мусобиқа Кан Александра зери вазни то 57 кг ноком шуд.

Ёдовар мешавем, ки дар мусобиқаи «Hong Kong Asian Open-2024» 128 ҷудокор (74 мард, 54 зан) аз 13 кишвари ҷаҳон иштирок карданд.

Дар телеграм моро пайгирӣ кунед!
https://t.me/halvaTJnews