Барои амалисозии ин лоиҳаи Барномаи рушди СММ аз ҷониби Русия 2 млн доллар маблағгузорӣ кардааст.

Рӯзи 21 август дар Душанбе давраи шашрӯзаи омӯзишии “Мусоидат ба шуғли аҳолӣ тавассути омӯзиши модулӣ”, ки аз ҷониби Русия дар ҳамкорӣ бо Барномаи рушди СММ ташкил шудааст, оғоз шуд. Дар ин бора сафорати Русия дар Тоҷикистон хабар дод.

Таъкид мешавад, иштирокчиёни давраи омузишӣ муаллимони таълими касбии Тоҷикистон ҳастанд, ки метавонанд асосҳои таълими касбии модулии Русияро аз худ кунанд.

Абдураҳмон Ашурализода, раҳбари Агентии меҳнат ва шуғли аҳолии Тоҷикистон зимни суханронӣ дар назди иштирокчиёни давраҳои омӯзишӣ ба аҳамияти таълими босифати касбӣ таъкид намуд.

Аз сӯи дигар Олег Илишев, мушовири сафорати Русия дар Тоҷикистон дар ин замина гуфт: "Русия ба Тоҷикистон дар такмили ихтисос ва рақобатпазирии кадрҳои миллӣ дар рӯҳияи муносибатҳои ҳампаймонӣ, ки кишварҳои моро мепайвандад, кумак мерасонад".

Зикр мешавад, ки ин давраи омӯзишӣ бахше аз лоиҳаи Барномаи рушди СММ зери унвони “Тавонмандсозии ҷавонон тавассути рушди малакаҳои касбӣ ва пешбурди навоварӣ дар Тоҷикистон” мебошад, ки соли 2022 оғоз шудааст. Барои амалисозии лоиҳаи мазкур Русия 2 миллион доллар ҷудо кардааст.

Ин иқдом ба таҳкими донишу малакаи ҷавонони Тоҷикистон, баланд бардоштани рақобатпазирии онҳо дар бозори имрӯзаи кор равона шудааст.