Қирғизистон ҳангоми ҳалли масъалаи марз бо Тоҷикистон табодули қаламравҳоро истисно намекунад. Ин пешниҳодро Марат Имонқулов, дабири Шурои амнияти Қирғизистон ироа кардааст.
 
Тоҷикистон ва Қирғизистон метавонанд қаламравро мубодила кунанд. Ин пешниҳодро дабири Шурои амнияти Қирғизистон Марат Имонқулов ироа кардааст.
Марат Имонқулов дар мусоҳиба бо хабаргузории давлатии "Кабар" гуфт, барои ҳалли масъалаи марз Қирғизистон ва Тоҷикистон метавонанд имкони табодули қаламравҳоро баррасӣ кунанд.
 
Ба гуфтаи вай, марз дар вилояти Бодканди Қирғизистон аз маҳаллаҳо, кӯчаву ҳавлиҳо ва ҳатто хонаҳо мегузарад.
 
«Корҳои таъйини хати марзӣ бо Тоҷикистон ба анҷом мерасанд, албатта, мо ду низоъро аз сар гузаронидаем, мутаассифона, ҳам дар байни шаҳрвандон ва ҳам дар минтақаҳои сарҳадӣ мардум нигаронанд”, - гуфт ӯ.
 
Ба қавли Имонқулов, мушкилот дар он аст, ки марз дар вилояти Бодканд аз қитъаҳои душворгузар, аз маҳалҳои аҳолинишин мегузарад. "Ин роҳи мушкили гузаштаҳои дуҷониба аст. Бе ин имконнопазир аст. Шумо бояд гузашт кунед. Агар лозим шавад, имкони табодули қаламравҳоро баррасӣ кардан мумкин аст. Ва албатта, бо аҳолии маҳаллӣ бояд ҳамоҳанг кард, ҳоло кор ҳамин тавр пеш меравад», - зикр кард Имонкулов.
 
Дабири Шурои амнияти Қирғизистон афзуд, тамоми равандҳои марбут ба таъйини марзҳо бояд ба таври осоишта идома ёбанд.
 
«Мо ин равандро бидуни поймол кардани манфиатҳои шаҳрвандони худ ва ҳамзамон бо назардошти манфиатҳои кишвари ҳамсоя имсол ба анҷом мерасонем, ки онҳо низ манфиатҳои моро ба инобат гиранд», - гуфт Имонкулов.
 
Бояд гуфт, ки Қирғизистон ва Тоҷикистон тавсифи 90 дарсади хатти марзиро анҷом додаанд. Дар соли 2023 гурӯҳҳои кории топографӣ 15 ҷаласа барпо карда, дар натиҷаи он тавсифи 169,48 км хати марзи миёни Тоҷикистон ва Қирғизистонро муаяйн карданд. Дар маҷмуъ хатти марзи муштараки Тоҷикистону Қирғизистон ҳудуди 987,6 километрро ташкил медиҳад.