Хабарҳои асосӣ дар Тоҷикистон
Сироҷиддин Муҳриддин дар Маскав бо Сергей Лавров суҳбат мекунад
Нашр шуд
Сухангӯи Вазорати корҳои хориҷии Русия Мария Захарова аз сафари қарибулвуқуи Сироҷиддин Муҳриддин ба Маскав ва мулоқоти ӯ бо ҳамтои русаш хабар дод.
Ба гузориши хабаргузории расмии "Ховар", Мария Захарова дар як брифинг гуфт, ки рӯзи 5-уми сентябр Вазири корҳои хориҷии Тоҷикистон ба Маскав меравад ва бо Сергей Лавров дидору гуфтугӯ анҷом медиҳад.
Гуфта мешавад, вазирони хориҷии Тоҷикистону Русия дар ин мулоқот масоили ҳамкориҳо дар бахшҳои тиҷорату иқтисод, фарҳанг, гуманитарӣ, мудофиа, амният, сиёсати муҳоҷират ва омодасозии кадрҳоро баррасӣ мекунанд.
Ҳамчунин ба андешидани тадбирҳои муштарак дар заминаи амнияти биологӣ, аз ҷумла мушкилоти эпидемиологӣ ва амнияти иттилоотӣ таваҷҷуҳи хоса зоҳир хоҳад шуд.
Захарова афзудааст, ки вазирон бояд иҷрои тавофуқҳоеро, ки дар мулоқотҳои ахири Президентҳои Русия ва Тоҷикистон ҳосил шуда буданд, баррасӣ намоянд.
Дар ин мулоқот инчунин дар мавриди масъалаҳои мубрами минтақавӣ ва байналмилалӣ, аз ҷумла вазъи Афғонистон табодули афкор сурат гирифта, барномаи ҳамкорӣ миёни вазоратҳои корҳои хориҷии Тоҷикистону Русия барои солҳои 2022-2023 ба имзо мерасад, - гуфтааст ин дипломати рус.
Бояд гуфт, ки Федерастияи Русия аз шарикони боэътимод ва стратегии Тоҷикистон аст ва ҳамкориҳои ду кишвар дар тамоми соҳаҳо ба таври назаррас рушд меëбанд. Аз ҷумла, дирӯз Президенти кишвар Эмомалӣ Раҳмон ва ҳамтои русаш Владимир Путин тариқи видеоконфронс панҷ мактаби тозабунëди русӣ дар Тоҷикистонро, ки бо маблағгузории ҷониби Маскав бунëд шудааст, мавриди баҳрабардорӣ қарор доданд.
Хабарҳои ҷолибтарин дар телеграмм-канали Halva.tj
Маводи зиёдтарро дар гурӯҳи фейсбукии Halva.tj ва саҳифаи мо дар Instagram дарёфт намоед