Маҳмадбековҳо: Намоди ҷудо дар Русия ва Тоҷикистон

Номи хонаводагии Маҳмадбековҳо на танҳо дар Тоҷикистон, балки дар Русия низ ба намоди муваффақияти варзишӣ табдил шудааст. Фаъолияти варзишии ин хонаводаи номдор дар Русия бо ифтитоҳи як машқгоҳи хурд дар шаҳри Иркутск оғоз шуд. Эргаш Маҳмадбеков, ки дар давраи ҷанги шаҳрвандӣ барои муҳоҷирати меҳнатӣ ба шаҳри Иркутски Федератсияи Русия рафта буд, машқгоҳи худро таҳти унвони "Mori" таъсис дод. Имрӯз ин машқгоҳ ба як намономи маҳаллӣ табдил ёфтааст, ки дар он кӯдакон ва наврасон аз рӯи низоми ҷопонӣ, аз ҷумла бо таълими эҳтиромот, инзибот ва руҳи варзишӣ фаро гирифта мешаванд.

Ба ҳирси як орзу!

Эргаш Маҳмадбеков, зодаи Тоҷикистон, дар синни 18-солагӣ бо далели даргириҳои дохилӣ дар Тоҷикистон ба шаҳри Иркутск нақли макон кард. Маҳз шуғл бо варзиш ба ӯ кумак кард, то аз мушкилот раҳоӣ ёбад. Мавсуф то синни 24-солагӣ дар риштаҳои самбо ва ҷудо тамрин гирифта, баъдан ба ҳайси муррабӣ машқгоҳи хусусии худро таъсис дод.

“Ҷудо як варзиши ҷопонӣ аст ва барои расидан ба муваффақият бояд аз равиши ҷопонӣ пайравӣ кард. Ҳадафи мо – тарбия кардани теъдоди ҳарчӣ бештари қаҳрамон ва иштирокчиёни олимпиада аст”, - иброз дошт  бунёдгузори машқгоҳи "Mori" ва ноиби президенти Федератсияи ҷудои Тоҷикистон, Эргаш Маҳмадбеков.

Дар тӯли 20 соли гузашта, ба лутфи рӯйкарди мунтазами Эргаш, Иркутск ба маркази тавсеаи ҷудо дар Русия табдил шудааст. Дар ин кор ба Эргаш бародари ӯ Фотеҳ низ кумаки бузург расонидааст. Дастпарварони бошгоҳи "Mori" Сомон ва Маҳмадбек бо пайравӣ аз амакашон дар мусобиқоти байналмилалӣ ҳунарнамоӣ намуда, соҳиби медалҳо гаштанд. Ҳардуи ин номбардорони халқи тоҷик дар рӯйи тушаки ҷудо ба воя расидаанд ва тамриноташон шомили як реҷаи сахту устувории руҳиро ба онҳо дод.

Маҳмадбек Маҳмадбеков, яке аз аъзои тими миллии ҷудои Русия, мегӯяд: “Бештари хонаводаи мо ҷудокорони ҳирфаӣ ҳастанд ва мо дар ин маврид сари мизи оилавӣ пайваста суҳбат мекунем”.

Ин бародарон, ки асолатан аҳли Тоҷикистон ҳастанд, аммо дар Русия ба сар мебаранд, масъулона тасмим мегиранд, ки таҳти парчами кадом кишвар рақобат кунанд: Сомон Тоҷикистон ва Маҳмадбек барои арҷгузорӣ ба Ватани худ Русияро интихоб карданд.

Сомон ва Маҳмадбек ҷоизаҳои мутааддӣ дар мусобиқоти бузурги байналмилалӣ, монанди Қаҳрамонии ҷаҳон, Гран-При, Гран-Слам ва Бозиҳои осиёиро касб кардаанд. Ин бор ҳам Сомон ба ҳадафи худ, яъне касби медали биринҷии Бозиҳои олимпии Порис расид.

“Медали олимпӣ як орзуест, ки ҳар як варзишгар ба фикри он аст. Бо орзуи баромадан ба зинаи шуҳрат ва шунидани суруди миллӣ ӯ ҳаёт ба сар мебарад”, - иброз дошт узви дастаи мунтахаби Тоҷикистон Сомон Маҳмадбеков.

Ватан интизор аст

Эргаш Маҳмадбеков бо лутфи рӯйкарди мунҳасираш, сатҳи ҷудоро дар Русия боло бурд. Имрӯз бошгоҳи ӯ "Mori" яке аз беҳтаринҳо дар ҷаҳон шинохта мешавад. Аммо ватанаш - Тоҷикистон ба таҷрибаю маҳорати ӯ ниёз дорад. Бо даъвати Исмоил Маҳмадзоир, раиси Федератсияи ҷудои Тоҷикистон Эргаш дастёри аввали ӯ шуд. Вай даъватро бо камоли мамнуният қабул карда, методикаи худро бомуваффакият ҷорӣ намуд. Дар тӯли солҳои ҳамкорӣ бисёре аз ҷудочиёни тоҷик дар радабандиҳои байналмилалӣ қарор доранд ва ҳеҷ гоҳ аз мусобиқот бе медал барнагаштанд. Соли гузашта Тоҷикистон барои аввалин бор дар таърих мизбони як мусобиқаи бузурги байналмилалии Гран-прӣ гардид. Варзишгарони тоҷик дар ҳисоби умумитимӣ 3 медали тило, 3 нуқра ва як биринҷӣ ба даст оварданд. Ба гуфтаи Эргаш Маҳмадбеков, ин аввали рушди ҷудо дар Тоҷикистон аст. Ҳадафи ӯ ба воя расонидани қаҳрамонони ҳарчӣ бештари ҷаҳон ва олимпӣ аст, ки Тоҷикистону Русияро дар арсаи байналмилалӣ шуҳратманд хоҳанд кард.