Донишомӯзони Тоҷикистон барои ширкат дар Олимпиадаи забони русӣ даъват мешаванд

Мактаббачагони Тоҷикистон ба Олимпиадаи XX байналмилалии забони русӣ барои донишомӯзони хориҷӣ ба номи В. Костомарова даъват мешаванд.

Дар ин олимпиада хонандагони аз 14 то 18-сола, ки шаҳрвандии Русия надоранд, метавонанд ширкат варзанд.

«Олимпиадаи байналмилалии забони русӣ барои мактаббачаҳои хориҷӣ аз соли 1972 баргузор мешавад ва аз соли 2024 ба номи асосгузори Донишкадаи давлатии забони русӣ ба номи В. А.С. Пушкин, доктори илмҳои филология, профессор, академик Виталий Григоревич Костомаров гузошта шуд”, - гуфта мешавад дар хабарномаи созмондиҳандагони олимпиада.

Олимпиадаи мазкур дар ду бахш сурат мегирад:

Бахши аввал барои хонандагони синфҳои болоии мактабҳои хориҷӣ, ки забони русиро ҳамчун забони хориҷӣ меомӯзанд.

Бахши дуюм барои хонандагони синфҳои болоии мактабҳои хориҷӣ, ки бо забони русӣ таҳсил мекунанд.

Шахсоне, ки шаҳрвандии Федератсияи Русияро доранд ё барои гирифтани шаҳрвандии Федератсияи Русия ариза додаанд, барои ширкат Олимпиада иҷозат дода намешаванд.

Дар баробари ин таъкид мешавад, ки кумитаи тадорукоти Олимпиадаи XX байналмилалии забони русӣ хароҷоти роҳкирои рафту баргашт ба шаҳри Маскавро барои иштирокчиёни марҳилаи ниҳоӣ пардохт карда, инчунин ин гурӯҳи донишомӯзонро бо барномаи фарҳангӣ фаро хоҳад гирифт.

Барои иштирок, дар олимпиада хонандагон бояд то 22 сентябри соли ҷорӣ худро сабти ном карда, варақаи ширкаткунандаро пур кунанд. (https://olympiada.pushkininstitute.ru/XX/)
 
Бояд гуфт, ки олимпиада бо дастгирии Донишкадаи ба номи Пушкин, "Россотрудничество", Анҷумани байналмилалии омӯзгорони забон ва адабиёти рус ва Вазорати илм ва таҳсилоти олии Федератсияи Русия баргузор мешавад.

Дар телеграм моро пайгирӣ кунед!
https://t.me/halvaTJnews