Олимпиадаи байналмилалии нуҷумшиносӣ дар Сочӣ интизори довталабон аст

Сеюмин Олимпиадаи байналмилалии кушоди нуҷумшиносӣ рӯзҳои 15-22 сентябри соли ҷорӣ дар шаҳри Сочӣ дар қаламрави федералии "Сириус" баргузор мешавад.

Тибқи иттилои сафорати Русия дар Тоҷикистон, ташкилкунандагони ин олимпиада қаламрави федералии "Сириус",  Бунёди «Истеъдод ва муваффақият» бо ҳимояти Вазорати маорифи Федератсияи Русия мебошанд.

Дар олимпидаи байналмилалии нуҷумшиносӣ аз ҳар кишвар як дастаи шомили 4 то 6 иштирокчӣ метавонад ширкат кунад.

Инчунин ҳар дастаро метавонад то 2 роҳбар ва 2 нафар нозир ҳамроҳӣ кунанд.

Таъкид мешавад, ки иштирокчиёни олимпиада асосан ҷавонони боистеъдод ҳастанд, ки барои расидан ба қуллаҳои нав дар илмҳои табиатшиносӣ ва байнисоҳавӣ, варзиш ва санъат талош мекунанд.

Ба ғайр аз супоришҳо, иштирокчиёнро маърӯзаҳои ҷолиб, дарсҳои омӯзиши маҳорат ва сафарҳои саёҳатӣ интизор аст.

Бояд гуфт, ки будубош ва ғизо барои иштирокчиёни олимпиада аз ҷониби ташкилоти мизбон  - қаламрави федералии "Сириус"  таъмин карда мешавад.
 
Довталабоне, ки худро барои иштирок дар Олимпиадаи байналмилалии кушоди нуҷумшиносӣ сабти ном кардаанд, бояд 14 сентябри соли 2024 дар шаҳри Сочӣ ҳозир шаванд.

Барои иштирок дар ин озмун довталабон бояд худро дар вебсайти расмии олимпиада сабти ном кунанд: https://owao2024.siriusolymp.ru/

Барномаи пешакии олимпиада, низомнома ва инчунин супоришҳои солҳои қаблиро дар вебсайти олимпиада метавон пайдо кард.

Дар телеграм моро пайгирӣ кунед!
https://t.me/halvaTJnews