Тоҷикистониён ба аввалин чемпионати ҷаҳон оид ба забони русӣ даъват мешаванд

Дар Русия нахустин чемпионати ҷаҳон оид ба забони русӣ байни шаҳрвандони хориҷӣ баргузор мешавад. Барои иштирокчиён викторина, мубоҳиса, саволу ҷавоб, тестҳои онлайн ва ҳатто озмунҳо бо зеҳни сунъӣ омода карда шудаанд.

Ба ин чемпионат дастаҳои шаҳрвандони хориҷии аз 16 то 22-сола, ки аз 5 нафар аъзо ва як нафар мураббии забони русӣ, ки дар хориҷа фаъолият дорад, иборатанд, даъват мешаванд.

Гуфта мешавад, ки барои мураббиён чиҳати омода кардани даста барои ширкат дар чемпионат барномаи ройгони такмили ихтисос пешбинӣ шудааст.

Барои ғолиб шудан, иштирокчиён бояд чанд марҳила, аз ҷумла сабти ном, интихоб ва мусобиқаи фосилавии дастаҳоро анҷом диҳанд. Марҳилаҳои ниҳоӣ ва маросими ҷоизасупорӣ ба ғолибон моҳи декабри соли 2024  дар шаҳри Санкт-Петербург баргузор мешавад.

Иштирок дар чемпионат ройгон аст. Довталабон метавонанд бо қоидаҳои иштирок дар чемпионати ҷаҳон оид ба забони русӣ дар сайти расмии russianchampionship.com шинос шуда ва то рӯзи 20 сентябри соли 2024 сабти ном кунанд.

Ташкилкунандаи чемпионати ҷаҳонии забони русӣ Муассисаи федеролии илмии «Маркази тадқиқоти иҷтимоӣ», як муассисаи тобеи Вазорати илм ва таҳсилоти олии Русия мебошад. Чемпионати забони русӣ барои аввалин бор ва бо дастгирии Вазорати маориф ва илми Русия баргузор мешавад.

Дар телеграм моро пайгирӣ кунед!
https://t.me/halvaTJnews